Con esta nova liña de acción buscamos formar a profesionais da educación formal ou non formal e acompañar a creación de pequenos grupos estables de rapazada nos que analizar as desigualdades na súa vida cotiá e xerar prácticas e discursos transformadores. O obxectivo é que as persoas participantes poidan ser axentes de creación de sentido común feminista nas entidades das que participan, nos seus centros educativos e cos seus grupos de iguais.

Ofertámosvos unha formación presencial de dúas horas na que abordaremos: pautas básicas de participación asemblearia, comunicación non violenta e dinamización, bebendo para todo isto da facilitación de grupos e a mediación. Tamén vos facilitaremos unha recompilación de recursos aos que poderedes recorrer para desenvolver as asembleas e tamén profundar na vosa perspectiva de xénero.

Teredes un tempiño para organizarvos como grupo e estableceremos unhas datas e horarios, en función das vosas necesidades (pode ser en horario extraescolar, en fin de semana ou incluso nos recreos), para que poidamos acompañarvos na preparación e desenvolvemento das tres primeiras asembleas. Podedes escoller formar un grupo feminista no que participen rapazas e rapaces, un espazo só de rapaces para traballar na construción de masculinidades libres de machismo ou ter un grupo de rapazas e/ou rapaces que periodicamente se reúne en grupos non mixtos para traballar atendendo a necesidades específicas.

Finalmente deixarémosvos voar libres e construír o voso propio camiño, pero ate que remate decembro estaremos á vosa disposición para facer unha última videotitoría por se queredes aclarar dúbidas ou simplemente contarnos como vai a vosa andaina.