Xogo de mesa - Campa
Xogo de cartas de temática “campamentil”. Seredes quen de sacar adiante todos os campamentos antes de que remate o verán?
Campa é o xogo do verán… literalmente! Neste xogo de cartas as xogadoras e xogadores póñense ao cargo de diferentes entidades que, chegado o mes de xullo, teñen un único obxectivo: sacar adiante todos os campamentos posibles antes de que remate o verán!
O obxectivo de cada xogador ou xogadora é ter, ao final da partida, o máximo número de puntos posibles. Os puntos obtéñense dos campamentos que, ao final de cada rolda de xogo (chamadas meses), estean en marcha. Para iso, as xogadoras e xogadores terán que xuntar todos os compoñentes para poñer en marcha os campamentos e mantelos en marcha ata final de mes, ao tempo que impiden ou dificultan que os e as rivais o fagan.
Cada partida dura tres roldas, cada unha dunha duración aproximada de 10-15 minutos, e correspondentes aos meses de xullo, agosto e setembro. Cando setembro finaliza, o xogador ou xogadora que máis puntos ten gaña a partida.
Neste vídeo podes ver, en poucos minutos, como se xoga a Campa.
A creación de Campa foi posible grazas a unha campaña de micromecenado a través da plataforma VERKAMI. Se non obtiveches o xogo en campaña, e tes interese en conseguir un, non te preocupes! Estamos actualmente falando con diferentes tendas especializadas para que sexan elas as que fagan a distribución. Por agora sabemos que está dispoñible en Júpiter Juegos (Ourense). En canto haxa máis distribuidoras irémolo anunciando.
O xogo de mesa Campa conta cun financiamento parcial da Deputación de Pontevedra a través das súas SUBVENCIÓNS DIRIXIDAS ÁS ENTIDADES CULTURAIS SEN FINS DE LUCRO PARA AS ACTIVIDADES DE DINAMIZACIÓN DA LINGUA GALEGA DO ANO 2021.
